الخرطوم : سودان لايف
دافع الممثل الكوميديان، عبد الله عبد السلام “فضيل” عن نفسه ومجموعته، عقب الهجوم الذي قوبلوا به مؤخراً.
وكان فضيل قد قدّم حلقة انتقد عبرها اتفاقية سيداو، ليثير جدلا واسعا بين مؤيد مشيد بالفكرة، ومعارض يراه منتمياً لحزب المؤتمر الوطني المحلول.
وكتب فضيل على فيسبوك ما يلي: جمهور الصفحة المحترم
التحية ليكم والله وربنا يتقبل الصيام والقيام وكل عام وأنتم بخير.. كل من دعمنا في مسيرتنا دي بقول ليهو شكراً ليك ونحن من بدينا نشتغل ما عندنا كبير غير الله وأولياتنا دينا ووطننا ومجتمعنا وكل أعمالنا بتدور في الفلك دة، وبإذن الله ما حنحيد عن مبادئنا لأجل حاكم أو محكوم.
وتابع: أما الناس الشايفة إنو نحن عملنا حاجة غلط فأرجعوا لأعمالنا المنشورة في القناة من تاريخ بدايتنا في 2018 حتلقوا إننا إتناولنا عدد كبير من قضايا الدين والبلد والمجتمع لا يسع المجال لحصرها في المنشور دة لكن قاعدة أرجعوا ليها بالمهلة.. وللبفتكروا إنو نحن بنبحث عن شهرة وأضواء فبحمد الله وبي جمهورنا المحترم نحن بنعتبر نفسنا محظوظين بأعداد كبيرة بتتابعنا في اليوتيوب والفيسبوك وحتى في عروضنا المستمرة والمباشرة في الشارع واللي ما إنقطعت لحدي قبل رمضان في الولايات وكان آخرها في دارفور.
واختتم عبد الله: خلاصة القول نحن في سبيل ديننا ووطننا ومجتمعنا مستعدين نتحمل كل الصعاب، وكل من أساء لينا بكلمة فالله أولى به، وكل من شكرنا فمن لا يشكر الناس لا يشكر الله فألف شكر ليكم.
