◄ بالعربي الكسيح
محمد الطيب الأمين
التكشيرة بالتكشيرة والبادي أهبل !!
* ليس هنالك فرحة تضاهي فرحة طفل (نام) بملابس العيد يوم الوقفة .
* النوم بملابس العيد قبل حلول العيد مرحلة مر بها نصف الشعب السوداني عندما كانوا أطفال.
* أذكر أنني واحد من الناس نُمت وأنا (شاكي الفانلة داخل الرداء) .
* نمنا بالجزمة والشُراب .
* ويا ريتنا لو كنا بنوم نوم مستقر .
* نومنا كان مقطع زي نوم رمضان عجب ومحمد الرشيد هذه الأيام.
* والله صحي.
* فرحتنا بالملابس الجديدة كانت تفوق أي فرحة أخرى.
* أي شئ جديد في حياتك يمكن أن يحميك النوم في أول ليلة.
* وبما أن ذلك كذلك فإن لاعب المريخ المصري عمرو علاء قد نام بالكدارة والتشيرت في الليلة الأولى بعد تسجيله في المريخ .
* من الفرحة نام بالكدارة .
* وهي أول مرة يلبس فيها كدارة.
* إتخيل معاي .. محترف أجنبي أول مرة يلبس كدارة .
* قالوا المصري ده الليل كلو كان بيعاين في (كدايس) الكدارة .
* غايتو دي سوداكال بالغ فيها .
* اااي المريخ بيستاهل لكن كمان ما للدرجة دي يا سوداكال .
* ما لدرجة تجيب ليك (بتاع كاشير من مطعم في الخرطوم ٢) .
* كده أوفر يا سوداكال .
* حبيبنا سوداكال اتفوق على جمال الوالي في الحتة دي .
* جمال الوالي زمان جاب محترف بوسني اسمو (نجاد) .
* نجاد عمرو كان (٤٢) سنة بيلعب مدافع .
* جمال الوالي شافو في مقر جامعة الدول العربية وجابو.
* عجبو الطول .
* شافو طويل قال ده معناها مدافع ناجح .
* البوسني نجاد كان شغال في جامعة الدول العربية في القسم الخاص بالأمن والسلامة .
* يعني زي شركة (الهدف) عندنا .
* هو (بوسني) لكن شغال في (جامعة الدول العربية) .
* الوظيفة دي كان أحق بها (مواطن عربي) .
* لكن ادوها للبوسني ده .
* جمال الوالي عجبو طول البوسني وسجلو طوالي .
* زمان جمال الوالي كان بيسجل اللاعب من (شعرو) .
* لو شاف شعر رأسك غزيز طوالي بيفاوضك .
* ويا حبذا لو كنت (مُمشط) شعرك.
* لو مُمشط شعرك جمال الوالي كان ممكن يطلع ليك (الجنسية) ويطلع للزول (المشطك) ذاتو .
* نجاد البوسني تم شطبه بعد (٣٤) يوماً واللاعب المصري سوداكال شطبو بعد (١٧) يوم .
* المصري ده ذكرني بالشاعرة روضة الحاج .
* روضة الحاج انضمت لحكومة البشير وبعد (١٦) يوم من انضمامها البشير سقط .
* نص مرتب بس .
* هسه المصري ده لو ما اديتو (نص مرتبو ده) بيمشي الفيفا .
* لكن بيني بينك زول (نام بالكدارة) ما بكون سمع بالفيفا.
* المهم .
* عندما غادر الهلال إلي يوغندا تم استقباله ب(البسمة) .
* إحترم فايبرز الهلال بصورة أكثر من رائعة.
* وعندما حضرت بعثة فايبرز استقبلهم الهلال بذات (البسمة) والإحترام .
* الآن في غانا يحاول الاشانتي أن (يُكشر) في وجه الهلال.
* حصلت جرجرة من الفريق الغاني والسلطات بمطار اكرا.
* وما معروف بكرة وبعد بكرة يحصل شنو .
* لكن بتجوا هنا يا حبايب .
* التكشيرة بالتكشيرة والبادي أهبل.
* والبسمة بالبسمة والبادي أجمل.
* السمح عندنا والشين عندنا .
* الهلال يجب أن يعامل الاشانتي بما يستحق.
* أول حاجة نفحص ليهم لحظة وصولهم المطار .
* على أن يكون فحص الفرد الواحد (٥٠٠) دولار .
* ونفحص ليهم عند وصولهم الفندق ، على أن يكون الفحص للفرد الواحد (٣٠٠) دولار .
* كتروا ليهم من الفحوصات عشان لما يرجعوا يكون مديونين.
* إلا يشيلوا سلفية من أسامة عطا المنان.
* وغايتو جنس غايتو .
* ملحوظة : (إن شاء الله سأكتب هذا العمود بإسم جديد خلاف الإسم الحالي اعتباراً من العام الجديد لأسباب سأشرحها لاحقاً) .
* ونركب صافنات ونجيبة (رفاعية) واصلو الزول بيموت والذكرى تفضل حية .
* و..و..
* وقالوا متألم شوية ياخ ……… (المصري نام بالكدارة) .
