*ولأن ترمب همجي وغوغائي
*خرج من قلوب الامريكان مع اول دورة
*وحتي في أمريكا بلد الديمقراطية يوجد همج حاولوا افشال العملية الديمقراطية بالبلطجة وكدة
*ولانه لايصح الا الصحيح
*انتصرت الديمقراطية علي الهمج وعلي ترمب
*وفاز بايدن الديمقراطي
*وهتف الشارع الامريكي
*ميلانيا ام جضوم الليلة مابتنوم
*وهتف الشباب في وجه ترمب
*ياعنصري ياجبان كل الدول سودان
*ايها الناس
*فوز الديمقراطيون بامريكا له مابعده
*فهم يحترمون الانسان وحقوقه ومنظماته
*ويجيدون خلق العلائق الطيبة تبادلا مع الآخرين
*والآخرين ديل الزينا كدة
*واعتقد ان فوزهم في هذا التوقيت في مصلحة الثورة وديمقراطية السودان
*برغم انو في ناس محسوبين علي السودان مابحبوا الديمقراطية
*لكن يسووا شنو الله غالب
*الماعاجباهو ديمقراطية في السودان يشرط جوازو السوداني لو كان بره البلد
*او يشوف ليهو سمبك يتخارج بيهو بره لو كان جوة البلد
*فالسمبك يشبه الفكرة
*فكرة رفض الديمقراطية لو سميناها فكرة
*المهم
*مدني لو ادي العيش لخبازو
*وخبازو اكل نصو
*اخير لينا من اكل النيم ده ياحمدوك
*الوعد كان
*حكومة كفاءات
*لا كفوات
*وفشل القيادة المدنية هذه لن يعيدنا لعهود العسكر وحكم البندقية
*ولكن ممكن يكلفنا مرقة خفيفه للشارع
*نشكل حكومة مدنية جديدة يامدني
*ونعود الي حيث النكهة
*الي حيث الواجب من خلال او مع لجان المقاومة
*اها
*قالوا سوداكال اخيرا تذكر انو الكورة الافريقية قربت
*قام اعلن اليوم بداية للاعداد
*بس ماورانا اعداد نفسي ولا بدني ولا فني
*ودي احدي خرمجات السيد سوداكال
*والعيب بتاع الخرمجة ده وارد من اي رئيس علاقتو بالرياضة حبة قريشات لملمها
*لملمها من وين ده ماموضوعنا
*فالاندية الرياضية (طشاتة)كبيرة لغسيل وتنظيف الاموال المتسخة
*لكن يشهد الله سودا ماشفناهو غسل في المريخ
*لانو اساسا ما ورانا مال عشان نعرفو مال نضيف ولا متسخ
*لكن الدايرين نقولوا لسودا
*مجالس المدينة تتحدث عن مؤامرة
*ولكن ثق تماما
*لن نسمح لك ببيع الديمقراطية التي ساندناها بكامل قوانا العقلية
*ولن نسمح لك بالتفريط في القانون
*ولا باهدار النظام الاساسي الاساسي
*فان كانت لك تحالفات تقوم علي إهدار مكتسبات تعبنا لتحقيقها
*بالله بعيدا عن ديمقراطيتنا
*فنحن بايدنيون اكتر من بايدن زاتو
*ايها الناس
*ان تنصروا الله ينصركم
*اها
*نجي لي شمارات والي الخرتوم
*كان شفت يا والينا بتاع الفرن نقول ليهو دايرين عيش اسطوبة يدينا
*العيشة (ان وجدت)من جوة اصفر من الدخن يا والينا
*ومن برة فسخ وجلخ وكريم اساس مابواسي جضومها لينا
*والعيشة ام عشرة لبة مافيها يا والينا
*قول لمدني يعمل ليها لبة وبخمساشر يبيعها لينا
*اخير من تكون ملساء من بره فاضية من جوة زي بت ام لعاب يا والينا
سلك كهربا
ننساك كيف والكلب قال الليلة والليلة بايدن فاز
والي لقاء
