(ظار) الفنانة “ايمان الشريف” وقصة (الثور)
مواقع التواصل الاجتماعي جابت لينا خبر أغرب من الخيال: قالت (في شقة بدبي، الطابق الـ١١، أقاموا طقوس “ظــار” شاركت فيها الفنانة إيمان الشريف والشاعر أحمد كوستي!
طبعا الخبر ما بس وقف هنا، لا… كملوا لينا التفاصيل لحدي صاحب الشقة، وموقعها في أي منطقة، وعدد البلاط في الصالة تقريباً… والاجمل من كده قالوا “(ضبحو) تور” عشان الظار! تور في الطابق الـ(١١) ! بالله شوف القصة دي… ياخ المصعد ذاتو كان محتاج (ظار) عشان يرفع التور.
لكن خلونا في سؤال: الخبر صاح ولا لا؟
الموضوع الحقيقي: هل الحكاية فعلاً في “ظــار” ولا مجرد “نجر” على إيمان وشاعرها؟
الوسط الفني ده معروف بي حروبو “غير الشريفة”، مرات بتبدأ كده وتنتهي بقصص أغرب من المسلسلات التركية. يعني موضوع الظار ده ممكن يكون بس “سجارة منهم” طلعوها ناس مصلحتهم يطفوا نجم لمصلحة نجم (دي بنجيها تاني).
الشي البحيرك .. إيمان الشريف بالذات… زولة بتعرف تركب الترند، ما اظن محتاجة ليها ظار؟ الناس ديل سنة اولى في الأشاعات محتاجين (كورسات)!! شان ناس الظار معروفين منو في الوسط الفني !!
نحنا متوقعين حرب وتصعيد أكبر وأعنف، القصة دي لسه “حتسخن”. بعد تنزل الاغنية الجديدة بس المره الجاية (الدراما التركية دي بلاش منها) ..
اخر سطر .. حقيقة في هبوط حاد في الوسط الفني وما اعتقد ده هبوط اضطراري … والدوام لله.
